Nijs

DC … en tichterby/DC … en dichterbij is de nijste, twatalige bondel fan Simon Oosting.  DC? Dat is Washington DC dêr’t Oosting in skoft wenne hat.

Net allinne DC en oare fiere streken komme oan bar, mar ek de omkriten fan de Feanhoop. Dêr hat Oosting in searje gedichten oer brêgen makke. De bondel hat fiif skiften dy’t allegear in motto meikrigen hawwe út de Odyssee, it troch Homerus skreaune klassike gedicht oer de reis fan Odysseus fan it eilân fan de nimf Calypso nei syn thúslân Ithaka.

De bondel ropt de lêzer op om de Homeryske reis mei de dichter oan te gean, mar úteinlik foaral om de reis fol ferwûndering yn en foarby de werklikheid te meitsjen.

De bondel DC … en tichterby/ DC … en dichterbij is te keap by de Afûk foar € 17,50.

Op 3 oktober 2020 wurdt de nijste dichtbondel, mei de titel Ommers, fan Geart Tigchelaar presintearre. Dat docht er yn ’e mande mei dichter Elmar Kuiper syn nije bondel, Wite Mûle, Swarte Molke, jûns om 19:30 oere yn Jorwert.

Yn ’e oanrin op de presintaasje wurde op it Instagram-akkount @om.mers foarpublikaasjes pleatst. It earste fers ferskynt op woansdei 26 augustus. Tigchelaar hat earder proazagedichten op it webstee fan Dichterskollektyf RIXT publisearre en kaam der sa efter dat de foarm fan ’e gedichten tige gaadlik is om op it sosjale mediaplatfoarm te pleatsen. De dichter hopet sa dat syn wurk foar in breder publyk tagonklik is. Publyk dat ornaris net gau yn oanrekking komt mei poëzy.

‘Troch Dichterskolletyf RIXT bin ik der efterkommen dat poëzy, hielendal proazapoëzy, him goed presintearje lit op de sosjale media en poëzy sa tagonklik makke wurde kin foar in breed publyk .’

De bondel, útjûn by Hispel, is Tigchelaar syn earste mei allinnich proazagedichten. Prozaysk fan styl, mar troch de kompaktens en de byldrike taal foarmje se poëzy. Yn Ommers spylje bonkerakken ksylofoan op ribbekasten, hat God bestjoer oer sânbakken en gûle boeken harren eigen siden wiet.

Wat: foarpublikaasje Ommers
Wêr: Instagram, akkount @ om.mers
Wannear:  fan woansdei 26 augustus ôf
Bondelpresintaasjes Ommers en Wite Mûle, Swarte Molke op 3 oktober, Jorwert

Dizze hjerst sette der meardere kursussen útein by Tresoar, en wy binne tige wiis dat dêr ek de earste poëzykursus organisearre wurdt troch Dichterskollektyf RIXT!

De poëzykurus is opset nei oanlieding fan de fraach en winsken by it Dichterskollektyf RIXT en sil it ferskaat fan poëzy beljochtsje. Dêrom is der ek net keazen foar ien kuruslieder, mar fiif. Dat binne Kate Schlingemann, Edwin de Groot, Dien L. de Boer, Geart Tigchelaar en Tryntsje van der Veer.

Dy fiif betûfte RIXT-dichters sille ferskate ûnderwerpen oansnije, lykas poëtyske eleminten, metafoaren, klisjees, fisuele poëzy en foardracht.

De kursus wurdt holden yn de mande mei Tresoar fan ein septimber oant ein novimber. Troch koroana is der in maksimum fan dielnimmers steld en is de kursus dêrtroch folslein beset mei RIXT-dichters.

Yn de hjerst binne teffens oare kursussen by Tresoar.

Dichterskollektyf RIXT mei in nije dielnimmende dichter ferwolkomje: Janna van der Meer. 

Nei in skoft bûten Fryslân wenne te hawwen kaam se werom yn it heitelân en brocht se yn 2017 har earste Fryske dichtbondel út, Wêzen. Kinst hjir sjen op har RIXT-profylside om mear oer Janna te witten komme én har gedicht ‘skepsel’ te lêzen.

It trochjougedicht ‘De bui’ is ôf! Op de Skriuwersarke by De Feanhoop hawwe in wike lang twatallen RIXT-dichters mei-inoar wurke oan it gedicht, dat begûn mei de ‘Rigel fan Rink’:

‘De mar nimt de bui net’

De dichters dy’t oan it gedicht wurke hawwe binne:

Cornelis van der Wal

Janneke Spoelstra en Rein de Lange

Kate Schlingemann en Edwin de Groot

Anne Heegstra en Simen de Jong

Carla van der Zwaag en Tialda Hoogeveen

Ypie Bakker en Tsjisse Hettema

Syds Wiersma en Dirk Geerdink

Yva Hokwerda en Jan Kooistra

Wy wolle alle dichters tankje foar harren entûsjasme, gearwurking en kreativiteit! It hat in prachtwike west op it Arkje mei in slagge en poëtysk resultaat!

Yn dy wike wie Geart Tigchelaar oanwêzich as gasthear en fotograaf. Alle foto’s hjirûnder binne fan syn hân.

Foar it mooglik meitsjen fan de ‘Rigel fan Rink’ wolle wy tanksizze:

Stifting FLMD en it Fryske Gea foar it beskikber stellen en klearmeitsjen fan de Arke foar RIXT;

Omrop Fryslân foar it deistige tillefoantsje mei de dichters;

Poiesz Boarnburgum foar it foarsjen fan drûch en wiet;

Kafee Marktzicht, Ronald, foar it wolkom hjitten fan ús foar in smoute ôfsluter yn Drachten.

 

Foto’s meie net sûnder tastimming fan de fotograaf Geart Tigchelaar brûkt wurde.

In prominint plakje foar poëzy yn it Frysk Deiblêd: hjoed stiet Dichterskollektyf RIXT op de foarside mei de ‘Rigel fan Rink’ en it trochjougedicht ‘De bui’.

“Yva Hokwerda en Jan Kooistra oan it dichtsjen op de Skriuwersarke fan Rink van der Velde by de Feanhoop. Tegearre leine sy yn de sinne de lêste hân oan it gedicht De bui dêr’t de ôfrûne wike yn totaal fjirtjin dichters fan dichterskolletyf RIXT in bydrage oan leveren. Yn twatallen skreaunen hja hieltyd in strofe op de Skriuwersarke. Dichter Cornelis van der Wal trape as fyftjinde dichter dêrfoar earne oars al ôf mei de earste strofe. It resultaat wurdt hjoed yn it bywêzen fan de dichters presintearre en foardroegen yn kafee Marktzicht yn Drachten. It gedicht is ek te lêzen op de webside fan it kollektyf: www.rixt.frl.”

It gedicht is te lêzen op RIXT en jûn wurdt it foardroegen yn Kafee Marktzicht, de âlde kroech fan Rink van der Velde yn Drachten.

Hâld der wol rekken mei dat der beheind plak is fanwegen de maatregels en feiligens!

De wike op ‘e Arke rint hjoed nei de ein en dat betsjut ék de lêste strofe foar it trochjougedicht, dat de namme ‘De bui‘ krigen hat.

Fan 1 oant en mei 7 augustus hat Dichterskollektyf RIXT op ’e Feanhoop yn de Skriuwersarke fan Rink van der Velde sitten. Alle dagen kaam der in twatal del om oan in strofe te wurkjen dat nei sân dagen in folslein gedicht wurden is.

Hjoed hawwe dichters Yva Hokwerda en Jan Kooistra by it Arkje as lêste pear it trochjougedicht ôfsletten mei de einstrofe.

‘We hawwe der ek wol even op omkôge, mar dat moat!
Mar it wie gjin swiere befalling, it wie leuk!’

Harkje hjir nei it lêste deistige tillefoantsje mei Omrop Fryslân foar de ôfsluter! Yva komt om 15:43 foar de tillefoan, Jan lêst it gedicht sa’t it wie foar en Yva hat de eare om de lêste strofe foar te dragen.

Ek komt Geart Tigchelaar oan de tillefoan, mei’t er de hiele wike foar de dichters soarge hat mei kofje, tee, wat lekkers en de nedige stipe! Ek hat er de wike fêstlein op byld, sadat wy alle dagen wer in moaie yndruk krigen hoe’t it op it Arkje wie. Geart is te hearren om 15:50 oere.

‘It is just wol hiel aardich om de minsken mei inoar yn ‘e kunde komme te litten en dat is hiel moai útpakt! […] Eins allegearre seine de dichters: dit is foar werhelling fetber, dit kin takom jier wer!’

Omrop Fryslân hat ek oer de wike skreaun en it gedicht taheakke: