Rixt – Frysk dichterskollektyf
Frysk dichterskollektyf
Fan ‘e moarn stie de kofje klear en wienen de dichters wakker optein om oan de slach.
Doe’t de kofjekanne goed en wol leech wie, koene de groepen op ‘en paad.
De dichters binne no noch drok dwaande mei de lêste puntsjes op de i’s te setten foar it optreden jûn.
Dat einoptreden sil plakhawwe by Teater de Rûnte, by de Folkshegeskoalle.
Waailân is úteinset mei de RIXT-dichters en dichters fan it eilân. Mei-inoar sille sy yn groepkes ideeën útwikselje, ynspiraasje opdwaan en poëzij kreärje.
Op de Folkshegeskoalle binne fan it Dichterskollektyf RIXT oanwêzich:
André Looijenga; Yva Hokwerda; Syds Wiersma; Carla van der Zwaag; Simen de Jong; Ilse Vos; Janna van der Meer; Simon Oosting; Dirk Geerdink; Tryntsje van der Veer
En fan it eilân binne de dichters oanwêzich:
Ina Schroders-Zeeders; Nienke Zorgdrager; Ruud Knier; Berber Sluiter; Jolanda Gooiker.
Op de jûn binne de dichters mei inoar yn de kunde kommen en hawwe hja ek út eigen wurk foardroegen. Simon Oosting en Syds Wiersma hawwe teffens elk in powerkolleezje jûn oer dichtsjen op lokaasje.
Nei de foardrachten hawwe de dichters yn oerlis harren plan lutsen om oan de slach om mei-inoar te wurkjen en jûn op te treden.
Hjoed komme de dichters oan by de Folkshegeskoalle Schylgeralân op Skylge foar it earste skriuwerswykein fan Dichterskollektyf RIXT!
De lêste slach wurdt noch makke (en de lêste posters ophongen) om it wykein goed ferrinne te litten, mar wy hawwe der sin oan.
It waar wurket yn alle gefallen tige mei, ‘Waailân’ docht noch net de namme eare oan dizze simmerske dei, mar oft wy dat slim fine? ….
De Dichter fan de Moanne foar septimber is Peter Vermaat.
De gedichten binne te lêzen op de gedichten fan de moanne.
De kraak van de kluis is in ferhaal oer ferset, ferried en leafde. In groep fersetsstriders ûntfrjemde yn 1943 it befolkingsregister út ‘e klûs fan it gemeentehûs fan it Bilt yn Sint-Anne. Hja woenen foarkomme dat jonge manlju nei Dútslân stjoerd wurde koenen. Dy heldhaftige died moasten se lykwols djoer betelje.
De kraak van de kluis is oars as ‘normaal’ teater. Fanwegen de koroanamaatregels is de produksje oer in oare boech smiten. Skriuwer Hein Jaap Hilarides bewurke syn skript en regisseur Sjoeke-Marije Wallendal ûntwurp in belibbing foar by minsken thús. De thúsbelibbing hat yngrediïnten dy’t alle sintugen oansprekke.
De kraak van de kluis hat plak op sneon 26 septimber fan 19:43 oere ôf. Besikers dy’t in kaartsje keapje, kinne de produksje yn harren eigen hûs belibje. Hja wurde oanmoedige om dat mei in âldere of krekt in jongere generaasje te dwaan (fan 13 jier ôf).
De kraak van de kluis wurdt makke yn it ramt fan 75 jier Frijheid. It is as ien fan de pear produksjes fan dit betinkingsjier oerein bleaun.
It suksesfolle evenemint ‘SatelLiet’ wurdt troch de organisaasje fan it sjongfestival ‘Liet’ yn de hjerst fan 2020 trochset. De beide muzykrûtes ‘SatelLiet’ wurde yn Aldebiltsyl en Koarnjum organisearre.
Yn ‘e rûte nei Liet 2020, dat plakhat op 6 novimber 2020, wurdt SatelLiet organisearre. Op freed 18 septimber en freed 16 oktober binne twa muzykrûtes mei lytsere en gruttere optredens te folgjen.
Yn septimber steane Fryske muzikanten en dichters yn Aldebiltsyl programmearre. Haadakt is Iris Kroes dy’t yn kultureel sintrum Aerden Plaats optreedt. De programmearring fan SatelLietis yn Aldebiltsyl mei winner Liet2019, Sequence en in foarstelling fan dichters fan Dichterskollektyf Rixt, Christa Niklewicz en Geart Tigchelaar.
Yn oktober folget Koarnjum, mei haadakt ZEA, programmearre yn Theater de Wier yn Koarnjum.
It folsleine muzykprogramma, en ek de dielnimmers fan it sjongfestival, wurdt letter bekend makke.
Kaartsjes(en reservearjen) foar 18 septimber en 16 oktober à 10 euro kinne besteld wurde by de Aerden Plaats (Aldebiltsyl) en Theater de Wier (Koarnjum). Reservearjen is needsaaklik yn ferbân mei de RIVM-rjochtlinen yn it ramt fan koroana. Beide jûnen wurdt wurke mei lytsere dielgroepen. Nei it reservearjen krije belangstellenden harren startlokaasje fia de mail tastjoerd.