Nijjierswinsk Dichters fan RIXT
kryst mei de bern
In krystgedicht fan moannedichter fan desimber Sipke de Schiffart.
kryst mei de bern op earste krystdei hie ik de bern fan myn eks, harren mem wie by har nije freon oan de ein fan de middei stie ik yn de iepen keuken iten te sieden: sykje mar wat krystmuzyk op, sei ik tsjin Suze de laptop wie op de telefyzje oansletten en sy fûn op YouTube in medley fan popkrystferskes ik hie ferskes as Stille Nacht, Heilige Nacht en Ere zij God en Nu zijt wellekome yn gedachten, mar goed ûnder Last Christmas fan Wham! tocht ik: wie de iepen keuken mar ticht is der net wat oars? frege ik Marie sette Boef op en kaam yn de keuken meisjongen sjonge? rappe! die prijzen gaan omhoog, die kech naar beneden tusken it rappen troch lei se út wat de Marokkaanske wurden betsjutten myn iten lêsten se net, ik hie sa goed as foar neat kôke, Suze bestelde patat en frikandel mei mayo en Marie in pizza salamy wylst ik siet te iten, wachten sy op harren bestelling doe’t ik it op hie, waard harren krystmiel besoarge wylst sy sieten te iten, socht ik op YouTube nei echte muzyk, ik fûn Es ist vollbracht songen troch Dietrich Fisher-Dieskau harkje famkes, dit is de earste kear dat jim Bach hearre se ieten braaf fierder as ik deagean, wol ik dat dit draaid wurdt op myn begraffenis gjin reaksje de lêste, kâld wurden patatsjes en de lêste stikjes pizza salamy wienen foar Tokki, de boarre dy’t omtrint alles yt nei it iten, doe’t ik de ôfwask die, siet Suze achter de pc en lei Marie op de bank mei har smartphone út de iepen keuken wei seach ik op it telefyzjeskerm in tige gewelddadige fideoklip fan Rammstein – Ich Will ik gong nei de keamer om it lûd sêfter te setten, doe seach ik dat it filmke yn fjouwer jier tiid op YouTube al 172 miljoen kear besjoen wie nei alle gedachten faker as alle kristlike krystferskes en Bach-Cantates byinoar
Wingewest sinne
Miljeuridder en dichter Geart Tigchelaar is plat foar sinnepanielen en oare wizen fan alternativen om fan de fossile brânstoffen ôf te kommen. Lykwols soe soks mei mear belied (sinnepanielen op dakken bgl.), oerlis en fyzje moatte. Oftewol mei justjes minder ekonomyske driuwfearen.
Klik hjir en hjir foar mear ynformaasje.
wingewest sinne de sinne giet foar neat op klinkt it út de kielen fan âlde profeten krekt dêrom is it sa’n leuk fertsjinmodel klinkt it út de kielen fan enerzjike bazen wat moat der fan my wurde klinkt it út ’e ierde wei mei al dy peallen my yn ’t liif en fel fertrape moatst net altiten sa seure klinkt it út de kielen fan arbeiders wês dan ek net sa goederjousk mei ik der ek wat fan fine klinkt it út ’e himel wei ik moat dit allegear mar machteleas oansjen wês dan ek net sa achteleas klinkt it út de kielen fan gewoane minsken wy binne it dy’t dokke moatte foar de transyzje haw ik dêr dan ek baat by klinkt it út ’e ierde wei ik moat it ynkassearje salang’t wy trochgean kinne klinkt it út alle kielen silstû it wol oerlibje hear
City of literature
Tsjisse Hettema reagearret op it feit dat Ljouwert City of literature wurden is.
City of literature city of light sitty of ferjitty worldwide ferlies oan wurden sa rekket de taal it ús oan dat er ferdwynt ús krewearjen hoe lyts ek de seedyk en alles sil it net keare skriesleaze greide, heide, natoer mei dyn fjoerreade rêst meist oergroeide benearing net lêst it útropteken dwêste © Tsjisse Hettema
Lilke mûne
Cornelis van der Wal skreau in klimaatgedicht.
Lilke mûne De wynmûne yn ‘e fierte liket te bewegen: it triljen fan jo wurge âlde eagen, of komt er tichterby? Faaks is it in grimmitige swarte wolk dy’t it wanskepsel omtriuwe wol. Fûgels fleane harsels dea tsjin wrede wjukken, ienris griene fjilden moatte gouden strielen heine. It leksum wurdt jo opsein troch in lilk klimaatfamke. Ferrinnewearje ús âld lânskip mar mei waansin.
generaasjekleau
Sipke de Schiffart is dichter fan de moanne desimber by RIXT
generaasjekleau ús heit wie in âlderwetske boer, hy gong moarns om healwei fjouweren oan’ t wurk en ferwachte fan my itselde mar ik wie in heale ieu jonger en gong jûns let op bêd, nei’t ik sjoen hie nei Veronica en de VPRO, dêrom kaam ik moarns letter fan ’t bêd ôf no tink ik: tusken fiif en seis oere derôf komme, dat is noch altyd tige betiid foar in jonge fan om de tweintich hinne moarns ier fierde ik in striid om wekker te wurden, alle moarnen waard ús heit lilk op my, omdat ik net avesearre op in moarn (no tink ik: middenyn de nacht) yn desimber 1980 kaam ús heit om healwei fjouweren oan myn bêd mei de meidieling dat Mick Jagger deasketten wie yn New York it berjocht hie it winske effekt: ik wie fuort sa wekker as in hazze, tefreden gong ús heit werom nei de stâl om it fee te fuorjen mar doe’t ik op de wekkerradio hearde dat John Lennon delsketten wie, net Mick Jagger, draaide ik my nochris om en foel wer yn ’e sliep
No tiisdeitemiddei 17-12-19 sil Sipke de Schiffart foarlêze by it krystbarren fan de personielsferiening fan de Fryske Akademy.
Wêr’tst sitst yn ’e kano
Edwin de Groot skriuwt: okkerdeis haw ik in operaasje hân yn Swol en seach ik wer ris wat technysk allegearre wol net mooglik is. Dat wy dy technyske mooglikheden lykwols net allinne foar ús heil en segen ynsette is ek evidint en meie wy ús lokkich priizgje dat wy it (noch hieltiid) goed treffe yn Nederlân. Der binne genôch dy’t nearne om frege hawwe en de sjit oer har hinne krije. Dus wat seure oer saken lykas fan 130 nei 100 en hoe swart is in Pyt no eins as it wurk derop sit is wol hiel lúks, as ik sa frij wêze mei. De ferdieling fan lok is wol wat op oan te merken.
Wêr’tst sitst yn ’e kano ik haw in hert, dat kloppet, mar geregeld spint it ek as in poes op ’e skurte fan in minskebern dat is net goed; fan dy poes wol fan it hert net wat men allegearre wol net kin mei it drukken op knoppen dokter sei neiertiid dat alles prima ferrûn wie ik sei dat de pine my tafoel werom op seal haw ik in bêd hiel lúkse yn alderhanne stannen en in TV mei in rolkrante mei dêrop de beurskoersen win some lose some en tuskentroch it nijs eat oer drones en hjitte hei bern op in skoalplein en in druk op in knop