jou my de maitiid is in fers fan Martsje de Jong. Meikoarten ferskynt de Deenske ferzje fan it gedicht yn it literêr tydskrift M gasin.
jou my de maitiid
jou my de maitiid
ast kinst, lit myn stappen
lichter wurde, myn holle
ljochter, meitsje kringen
yn myn fiver
wier, ik bin gjin swiersetter, mar
myn liet klinkt falsk, myn liif
sit fêst en it aai brekt
as ik it beethâld
jou my de maitiid
ast wolst, stryk dyn hân
oer myn hert, skodzje myn
ritme, plantsje blommen
yn myn ierde
te kâld, dizich en griis is de moarn
te wreed de wrâld
slingerje my werom yn myn baan
om de sinne, ik wol
striekesmite, klaaipoaten
befykje, peaske-aaien stjoere
nei it front