Rixt – Frysk dichterskollektyf
Frysk dichterskollektyf
Poëzij fan Carla van der Zwaag.
Swier In besliepte wrâld. Wyn hellet rillich oan Swiere wolken komme jachtich op ús ta. Mei it krôkjen fange fleagen oan. Yn ’e kream folt de loft har mei readfallich ljocht. Lang ynhâlden azem ferlit mei krêft it himelbêd Stripen snie wiskje oer fjilden, bedobje stadich lijen. By ’t ferdrûgjen fan de wite poppe foegje wy koaltsjes, woartel en in sjaal ta.
Geart Tigchelaar is Streekdichter fan Noardeast-Fryslân 2021-2023 en makket foar RIXT by elk fers in filmke.
It fers ‘klisjees’ (‘clichés’) is syn earste fers dat skreaun is nei oanlieding fan it tema ‘mei-inoar’ fan de Poëzywike.
De Nederlânske oersetting is fan Syds Wiersma.
En bist wekker wurden goed gefoel is Syds Wiersma syn tredde moannegedicht fan jannewaris 2021.
En bist wekker wurden goed gefoel wat giet der yn sokke hollen om? wêr helje se de ûnbeskoftens wei om oarmans guod blyn har ta te eigenjen? hoe binne se moarns wekker wurden mei de knip op ’e bút? wat seit it gewisse einliks? hingje der gjin spegels by dy lju yn de huzen? hoe ferklearrest it psychologysk of moatte wy it patologysk besjen as sa’n man as Mark R. seit dat er wol de baas wie mar net krekt wist wat der barde doe’t er derby stie te sjen him dêrom net skuldich fiele kin mar in pear wiken letter wol om it hurdst ropt dat sokke plonderjende relskoppers rosmos binne wat giet der yn sa’n holle om?
‘Fyts ’m d’ryn Mark’ is Tsead Bruinja syn lêste gedicht as Dichter des Vaderlands.
Fyts ’m d’ryn Mark elke kikkert moat syn fiver kenne sizze se yn bulgarije ik tocht dat it betsjutte datst op ’e hichte wêze moatst fan wat der yn dy fiver libbet mar wa’t dêr syn eigen fiver ken as kikker wit syn plak is de werklike betsjutting it is de heechste tiid foar my dizze fiver op te jaan wat net slim is ik bin wyt haw wurk oan fraude sinjalearring foarsjennings bewarje ik gjin inkeld oantinken ik kom net foar op ôfwurke listkes gjin skandaaltsje klibbet oan my útsein xxxxxxxxxxxxxxxxxxxx xxxxxxxxxxxxxxxxxxxxxxxxxxxxxxxxxxxxxxxxx xxxxxxxxxxxxxxxxxxxxxxxxxxxxxxxxxxxxxxxxx xxxxxxxxxxxxxxxxxxxxxxxxxxxxxxxxxxxxxxxxx it is in frij lân boppedat justjes frijer foar my en de direkteur fan ’e belestingtsjinst as foar fatima tarik of genelva in traap nei wol ik dy net jaan mark in aai oer de bol ek net al hiest it goed mei my foar en makkest oeroeren op dyn oeroeren (as ik folslein ynformearre bin) mei dy fierder en mei-inoar oan ’e slach fyn ik wat oerdreaun of wy nifelje fan ’t simmer in sydspan oan dyn koga en melde ús oan by dat spulprogramma klearebare willewurk sa wier helpe my god almachtich ek dy fan fatima tarik en genelva
oersetting: Geart Tigchelaar
Klik hjir foar it Nederlânske orizjineel.
Sense of place is Syds Wiersma syn twadde moannegedicht fan jannewaris 2021. It fers is skreaun nei oanlieding fan it ferstjerren fan Joop Mulder. It is de ferbylding fan in kuiertocht bûtendyks, op de grins fan de Nije Biltpôlen en it Noarderleech, ien fan de biotopen dus dêr’t Mulder syn kust-keunstwurken foar Sense of Place situearre en fisualisearre.
Sense of place Nije Biltpôlen/Noarderleech Gjin moarnsmins glydzje ik út oer rûchferzen slyk. Beripe poldykjes. In wite dea fan oanspield snileguod. Rusken sneedsk brún as sloopark. Ik folgje de slinke, ik kin net oars, as bern al berûn ik bochtige sleatswâlen, stand-ins by krapte oan oprinners. In strypke eilân dêr, leit hjir bûtendyks lân skaakt ûnder in loft dy’t glierblau syn troef fan ûnskuld útspilet, glêzich de oeren klimme lit, teie ta in sompe fan finisterre. Skou krûpt it streamen. Werom yn Nijesyl knoffelje ik oer bulten, snip tsjirpende mosken om se letter grif as platfiskjes frij te litten út kustwurken. No no-nonsense myn stap oer ’t beton. It boulân lekt alwer wetter út de pypkes op de Aldrij. De sinne búkbelslidet oer in flueske iis. Jezushin stekt hastich oer: roppich nei fergetten bliid boadskipkes.
realia is it earste gedicht fan Syds Wiersma as moannedichter fan jannewaris 2021.
Dichterskollektyf RIXT winsket elkenien mei in fers fan Carsten René Nielsen en oersetten troch Geart Tigchelaar in sûn en poëtysk 2021. De tekening is fan Mette Norrie.
