Rixt – Frysk dichterskollektyf
Frysk dichterskollektyf
In gedicht fan Lara Kool
it is wynstil
dýnstil
sis dochs wat
bestean ik wol?
driigjend as de nacht
do witst
wat ik net wit
yn stilte leit macht
hoe stiller oftst bist
hoe lûder ik wurd
healwiis op ‘e syk
nei wurden
dy’t fertelle dat ik noch bin
wylst ik mysels wei jou
oan it tsjustere gat fan
foar de stoarm
foar altyd dyn-
Ssshhhh
Ypie Bakker is dichter fan de moanne augustus by RIXT. Har twadde moannegedicht is ûntstien.
Ypie Bakker: ‘Dit fers ha ik by bygeande bylden makke foar de eksposysje: ‘De weg naar het beeld’, fan Staal en Steen.’
ûntstien
alles wie al
besletten yn stien
it bern foetus noch
beferzen yn de memmeskurte
it famke ferstille
fossyl fan ferlerne tiid
de brekbere frou in dame
kwetsber mar krachtich
se wachten
do seachst en trochseachst
fieldest en foarmest
haktest hurdens fuort
rasptest rauwe rânen flak
swierte waard lichter
ballast waard stof
blaasdest it fuort
der foel in lêst fan dy ôf
it wie folbrocht
dame, famke
bern yn ’e knop
glânzen yn ’t ljocht
Ypie Bakker is dichter fan de moanne augustus by RIXT. Har earste moannegedicht is ‘op de Swetteblom’.
Duorsumens en frijheid stiet heech yn it findel op de ekologyske camping de Swetteblom. Werom nei de basis is dêr it kredo. Yn de wenwein fan Syds Wiersma (dy’t op dat momint yn Ierlân siet) hope ik wat ynspiraasje foar gedichten op te dwaan.
Ypie Bakker
op de Swetteblom
swijt de tiid
is stilstân
foarútgong
en it gers
griener
by buorman
weidzje de kij
earmerkfrij
hinget poëzy
op it húske
hoecht de doar
net op slot
weagje ik
myn wurden
fan glês
raant it iis
hurder as
ik slikje kin
Janneke Spoelstra is dichter fan de moanne july by RIXT. Har twadde moannegedicht is It ferrin II.
It ferrin II
Der rekke ien by wei,
der kaam ien by.
En alles begûn
wer op ’e nij.
It gedicht is in ferfolch op it fers ‘It ferrin’ dat Janneke Spoelstra skreau foar it projekt ‘De rigel fan RIXT’ (27 sept 2021) – https://rixt.frl/2021/09/27/de-rigel-fan-rixt
‘Einstasjon’ fan Lara Kool
Einstasjon
In trein fol minsken
wurdt in romte fol gedachten
in fleach fan fielen
we binne mei-inoar ien
Elts mei in eigen rûte
in eigen bestimming
har eigen doel
guon foarút, guon efterút
Mar no allegear
tafallich op itselde stuit
Ien momint yn ’e tiid
In trein fol mei minsken
op folle krêft
En doe…
Wiesto dêr
Woest der ek graach by hearre
mei dyn eigen gedachten
dyn gefoelens krekt as uzes
ûnwittend fan de krêft yn dy
Foar in trein fol minsken
Derfoar
Net deryn
Koest der nea mear by
Allinnich mar der omhinne
Derûnder
Ferspraat…
De minsken yn ’e trein
Stoarje foar harren út
Wiest mar gewoan ynstapt
Mei in oare einbestimming
Lara Kool makket har debút op RIXT mei it fers ‘Asjebleaft’.
Asjebleaft
Krekt troud
in nestke boud
fielde dyn siel yn my
Dan krampen,
bloed… en dy
it is foargoed foarby
SLACH yn myn búk
TRAAP yn myn búk
in foet en noch in fûst
Fertel my dochs
do fieldest it net
hast der trochhinne koest
Janneke Spoelstra is dichter fan de moanne july by RIXT. Har earste moannegedicht is droechst ús.
droechst ús
wat soe ik
moatte, sûnder
jim, seist
wa binne
wy
sûnder dy