Ut alve ynstjoerings dy’t ús oprop foar de Fyftjin FF’en fan Frijheid opsmiet, hat de redaksje fan RIXT fiif gedichten selektearre. Dy publisearje wy de kommende dagen op ús webside. Ien gedicht is bekroand. Dat ferskynt op 5 maaie. As beleanning krijt dy dichter de bondel Arbolarium.
De mânske blomlêzing Arbolarium is in Kolombiaanske blomlêzing fan 148 dichters, fan 78 lannen oer fiif kontininten, fandêr de ûndertitel De los cinco continentes. Geart Tigchelaar is ien fan de dichters dy’t yn dizze blomlêzing opnommen is.
As fyfde, en winnende gedicht yn it ramt fan Fyftjin FF’en fan Frijheid ‘Poilvache’ fan Gerrit de Vries
Poilvache ferdwaalde toeristen kinne der noflik kuierje en nei de tiid in slokje it is stil yn Poilvache beammen waakse út de ynstoarte muorren dambuordsjes fladderje moai en rêstich boppe in fjild mei wylde blommen ûnder de rotsen glimket de Maas fredich gjin krâns te sjen seishûndert jier lyn sawat is hjir in stêd útmoarde en platbaarnd soe it elts jier ien minút stil west wêze flaggen healstôk soe immen hjir ea in fers foarlêzen ha soe der in stille tocht west ha soe immen sein ha dit nea wer wy sille nea ferjitte as aanst de stimmen swije folgje wy dan it spoar keapje in kaartsje yn Westerbork lústerje stielen earen stil nei in swijsum swurk bloeie iensum wylde pearze lupinen fredich kinne wy dêr dan noflik kuierje en nei de tiid in slokje hawwe we frijheid om te ferjitten