Ineke van der Heide is dichter fan de moanne jannewaris 2025 by RIXT. Har tredde moannegedicht is ‘Knoffelje’.
Knoffelje
Ik moat hurd
aveseare
wer besykje
myn learzens
bin’ te grut
ik stroffelje
ik knoffelje
as in ko op klompen.
Knoffelje
taktiliteit
By de beide poëzijmiddeis fan RIXT yn it Tripgemaal by Gersleat op 13 en 20 oktober foarich jier koenen besikers in wurd achterlitte as bydrage oan it ‘TripOer-gedicht’.
Fjouwer dichters fan RIXT hawwe mei de ynsammele wurden te set west.
Hjoed it gedicht ‘Taktiliteit’ dat Ypie Bakker gearstald hat.
taktiliteit
yn ‘e jûnsoeren hokket jongfolk achter bline doarren
skaftketen lardearre mei ôfwaaid praat
hearst der net by bist net gelokkich dyn gedachtekrêft
net ôfsteld op deselde golflingte as mienskip en fûgel
nimmen wit fan sompe en greppel
it hiem bûtenút
groeipine yn houtnerven
de wrâld in grouwélige ôfgrûn
it duorret langer foar dy, bist in dreamer in dichter libbenslang útfanhûs
dyn thús in ljochtspegeling fan opfleanend reinbôgewetter
bjusterbaarlik hoe’t delten hichten wurde ast it perspektyf feroarest ast ja
seist tsjin lykweardigens, tiid en sin net bedjerre litst troch njirren fan agresje
dyn rispinge: yn wibeltwiich enoarme beam sjen dêr’t grutske
ûnwaarsfûgels skûlje foar bluisterige stoarmwyn en yn ’t pypskoft skoalbern
ferdivedaasje sykje, fryske stabij as tank balstjurrich syn geurflagge útset
poddestuollen as skieppetsyskes út krûderike blèdegrûn barste
earms omfiemje rûge bast
ûnrêst wurdt trochslûze
giet oer yn natuerrêst
sopstream brûst troch bloedstream
Swiet
Ineke van der Heide is dichter fan de moanne jannewaris 2025 by RIXT. Har twadde moannegedicht is ‘Swiet’.
Swiet
Sytske hâldt fan sûkelade,
fan sûkerbôle
fan sjerp en sjem
fan ierdbeien mei sûker deroer!
Sytske priuwt in sitroen
sa soer, sa soer…
ik sjoch it oan har mûle
har mûle kin der wier net oer.
Trip god, dichter of filosoof
By de twa poëzijmiddeis yn it Tripgemaal by Gersleat op 13 en 20 oktober foarich jier koenen besikers in wurd achterlitte as bydrage oan it “TripOer-gedicht”
Fjouwer dichters fan RIXT ha mei de ynsammele wurden te set west.
Hjoed it gedicht ‘Trip nog maal’ dat Christa Niklewicz gearstald hat.
Trip god, dichter of filosoof
====
Do bist útfanhûs op de wrâld, dizze wrâld
Op syk nei ferdivedaasje
As in beam sûgest krêft út de sompe
Sjochst oer hiem, mienskip en ús rispinge
Priuwst mei goed sin fan in grouwélich stik skieppetsiis
Wylst bjusterbaarlike natuerrêst útstjoerst
===
Myn ôfwaaid praat is oergien yn hurde wyn
Myn golflingte bedjert
By de ûnwaarsfûgel dy’t mei agresje oan bline doarren rammelet
Om’t groeipine de tiid oerlibje sil
Bluisterich pikt de fûgel rûnom de kearn fan it houtnerf
“Het duurde langer, uw proces is doorgesluisd naar een volgende dimensie”
Moat ik my ynhâlde foar it pypskoft fan in god – lardearre mei balstjurrige taktiliteit?
Hy sil filosoof of dichter wêze
Dy’t fanút syn -mei opfleanend reinbôgewetter en stoarmwyn lardearre schaftwagon-
Myn ôfgrûn bestjoert
Is myn wibelich wêzen foar dy in ljochtspegeling?
Binne wy lykweardich?
Fregest oft ik lokkich bin hjir bûtenút
Ik sis: Ja, enoarm
Bist grutsk op ús, hingest de flagge foar ús út
Dyn krêftich tinken is as in bluisterich kruidenrijk yn abendstunden
== god, dichter en/of filosoof ===
Tige tank foar it wetter yn ’e greppel
Der’t de Fryske Stabij, kij en wy ús de fuotten yn sette
Der’t in njirre lavearjend de kop heech hâld
Utfanhûs
Ineke van der Heide is dichter fan de moanne jannewaris 2025 by RIXT. Har earste gedicht is Utfanhûs.
Utfanhûs
Toskeboarstel yn ’e tas
bearke yn ’e bûse
pyama net ferjitte
ik gean útfanhûs.
Dei heit, dei mem
ik sil by beppe koese
ik gean útfanhûs
en moarn kom ik werom.
abendstunden
By de twa poëzijmiddeis yn it Tripgemaal by Gersleat op 13 en 20 oktober foarich jier koenen besikers in wurd achterlitte as bydrage oan it “TripOer-gedicht”
Fjouwer dichters fan RIXT ha mei de ynsammele wurden te set west.
Hjoed it gedicht Abendstunden dat Bauke Terpstra gearstald hat.
*wurden yn – kursyf – bin troch besikers fan de poëzymiddei De Elemintêre Deelen oanlevere as wurd foar it ‘TripGemaal-gedicht’.
natuerkunde
Edwin de Groot is de dichter fan de moanne novimber 2024 by RIXT. Syn twadde moannegedicht is ‘natuerkunde’.
Foar Mychájlo Drai-Chmára
Syn lêste wurden: Smoarge kloatsek
Kolyma; 19-01-1939
natuerkunde
op appél sjongt de boal
eltse fiifde yn de rige
krijt de kûgel
do stiest op seis: nim my, sparje dat jonge libben
en treft it dat hy krekt foar dy stiet
de krêft fan it skot dy op ’e rêch kwakt
net mei dyn gesicht yn de dridze
net mei dyn noas op it puntsje fan syn learzens
as wie it datst dy tutest