Nijs

Op & Ut * Omrop Fryslân * Poezywike, Grutte Gedichtejûn, Rixt Dichterskollektyf en FeRstifal

Sjoch it programma op Youtube: https://www.youtube.com/watch?v=qaEPqzsXoG4

Publykslêzing snein 9 febrewaris 2025, Nieuw Allardsoog, Bakkefean

Op sneon 8 en snein 9 febrewaris hâldt it Skriuwersbûn in noflik wykein foar leden. Nei in aktive workshop oer toanielskriuwen op sneon, is der op de sneintemoarn in lêzing dy’t ek tagonklik is foar it publyk. Abe de Vries (skriuwer, dichter, oersetter, essayist, journalist en mear) sil leafhawwers fan de Fryske literatuer fertelle oer syn biografy oer Waling Dykstra (1821-1914), samler en skriuwer fan folksferhalen en ek einrekdakteur fan it Frysk wurdboek. Wat makket Waling Dykstra sa spesjaal en nijsgjirrich en hoe wurket dat: in biografy skriuwe?

De lêzing begjint om 10.30 oere en kostet foar net-leden fan it Skriuwersbûn € 15,00 (mei kofje/tee en wat derby). Wa’t nei ôfrin ek graach lunsje wol mei de oanwêzige skriuwers, om te praten oer harren wurk en de Fryske literatuer yn it algemien, is fan herten wolkom. Lêzing en lunsj binne dan € 30,00. Oanmelde foar de lunsj is wol ferplichte. Dat kin op ynfo@skriuwersbun.frl

Snein 9 febrewaris 2025, 10.30 oere, Nieuw Allardsoog (seal De Eend), Bakkefean.

In jûn oer Emily Dickinson en it oersetten fan har poëzy.

Dizze gearkomste is yn it Frysk.

Har poëzy is guon lêzers sa dierber dat se har koartwei Emily neame, as wie sy in hertsfreondinne. Tagelyk heart it wurk fan de Amerikaanske dichteres Emily Dickinson (1830-1886) ta de hichtepunten út de wrâldliteratuer. Botte tagonklik is it oars net: Dickinson har gedichten binne faak riedseleftich en tsjuster.

It oersetten fan har poëzy yn it Frysk is in dryste ûndernimming, mar it bringt it ek tichterby. Yn neifolging fan de Fryske dichter Obe Postma is Klaas van der Hoek dy útdaging oangongen. It risseltaat is syn lêstendeis ferskynde bondel Smel is it Strân fan ’t Hert, mei 150 Dickinson-oersettings.

Sjoch foar mear ynformaasje by Tresoar

Frysk en Frij jout in sammeldichtbondel út mei lyryk oer it tema: Ierdappel. Oarspronklike fersen dy’t net earder publiseard binne. Soks yn it ramt fan in histoarysk-multykulturele meartalige manifestaasje, – De keunstmjittige ierdappel? – sjoch Erfgoed Fundaasje. It wurk kin gean oer de ierdappel yn alle opsichten en ynstjoeringen yn alle tongslaggen binne wolkom. By guon talen en dialekten is in oersetting yn it Frysk of Nederlâns wolkom, dat kin de skriuwer sels it bêste besjen.

Sjoch foar mear ynformaasje by Frysk en Frij

De earste fan twa poëtyske middeis, organisearre troch it Frysk dichterskollektyf RIXT, yn gearwurking mei Stifting It Tripgemaal.

Fan healwei twaen ôf rûnen de minsken ûnder in reinbôge it Tripgemaal yn. Poëtysker koe hast net. It waar slute perfekt oan by it tema fan dizze middei: ‘De Elemintêre Deelen’, in tema dat alle dichters op ferskate wize ynterpretearre hiene. Diskear wienen Syds Wiersma, Lara Kool, Christa Niklewicz, Anne Heegstra, Job Degenaar en Tanja van Abbema oan bar. Tuskentroch spile pop-folkduo ‘biologisch afbreekbaar’ harren prachtige nûmers en wie der ek in gastoptreden fan de Ierske dichter John Brown út Belfast. In bysûndere middei, dêr’t spontaanwei dichterduo’s ûntstiene, wat it ta in unike ûnderfining makke. Al wie it kâld yn it Tripgemaal de sfear wie waarm en gesellich.

Foar wa’t it mist hat, kommende snein noch in kâns: Edwin de Groot, Dien L de Boer, Carla vd Zwaag, Ypie Bakker, Janna vd Meer en Bauke Terpstra sille harren wurk foardrage. Om 14.00 oere yn it Tripgemaal, ynrin fan 13.30 oere ôf en de tagong is fergees.

Lara Kool

Foto’s Geart Tigchelaar