Gedichten fan de moanne

Syds Wiersma is dichter fan de moanne juny. Hy hat yn april-maaie troch Ierlân reizge en dêr poëzy skreaun. By RIXT publisearret er no in pear fersen dy’t geane oer bysûndere bergen dy’t er oan de westkust fan Ierlân beklommen hat. It twadde gedicht The Reek giet oer de Croagh Patrick (764 m), in eintsje bûten Westport oan Clew Bay. The Reek is de lokale bynamme foar de Croagh Patrick, omdat de koanyske foarm fan de berch wol wat liket op hoe’t de turven faak yn it fjild faak steapele wurde om te drûgjen.

The Reek
Westport, Croagh Patrick

Sa leist de turven, yn in reak,
in grize piramide op de sompen.
Sint Patrick sodze troch it weak
doe’t hy op grutte muontseklompen

fan Ballinduffer Abbey kaam
om fjirtich nachten op de top te fêsten,
it heidensk njirrebrod te slaan
en honger, toarst mei rein en kjeld te dwêsten.

De berch omheech oer wrede stien,
de ien dy krûpt, de oar betwingt de hichte,
mar oars is elk nei ûnd’ren gien:
Clew Bay in spegelryk fan kustgesichten.

’t Kapeltsje boppe-op is ticht,
guon bidde roazehuodsjes op de treden,
de rest sjit plaatsjes fan ’t útsicht,
de hillige yn ’t tsjuster swijt oer frede.

Wat Jezus fûn yn de woastyn,
bedjippe Paddy út rikjende Ierske loften.
De wrâld, it libben is in myn
foar wa’t de tiid nimt, lange lege skoften.

Syds Wiersma is dichter fan de moanne juny. Hy hat yn april-maaie troch Ierlân reizge en dêr poëzy skreaun. By RIXT publisearret er no in pear fersen dy’t geane oer bysûndere bergen dy’t er oan de westkust fan Ierlân beklommen hat. It earste gedicht The lone poet giet oer de Nephin, de heechste stand-alone berch yn Ierlân (806 m). The Nephin leit oan de westkust yn county Mayo, boppe de stedsjes Westport en Newport.

The lone poet
North Mayo, the Nephin

De âlde, drôve dichter sliept meastal,
in stand-alone dy’t hearsket as er wol.
By ’t wekker wurden knypeaget er koart,
bisto it dy’t er sjocht, dan slacht syn wurd
dy mei de macht fan hazzenutehout.

De âlde dichter hat in hiel grut hert,
dat leit nei ’t noarden iepen yn it skaad
en brocht leau ’k nea in hillige omheech.
Hy is gewoan in mânske berch, wat dreech
fan aard mar wol de sit fan goademacht
en Connaughts keningen, en elvedracht.

Hy briedt al iuwen op syn lêste fers,
it moat in bytsje oars no, wiis mar dwers.
Hy skriuwt it nachts en sjocht dan achterom
en ropt syn muze en syn maat: Lough Conn,
in mer à boire dat bearzen foar him fong.
Is ’t dêrom dat syn rêch wat fiskich glimt
yn ’t ljocht dat jûns sa fier út see wei skynt?

Ina Schroders-Zeeders is dichter fan de moanne maart 2024. wees gegroet / wês groete is har tredde moannegedicht.

wees gegroet

over de begraafplaats in de nacht
stapt Gabriël
zijn ene vleugel lam
zijn kruiwagen vol teddyberen

het spoor van witte veren in de morgen
als dat van een geslachte duif
loopt tot aan het roestig hek
met mistig licht erachter

in de krant spreekt men van stortbuien
ook teddyberen regent het steeds vaker
veroorzaakt door verandering
van het klimaat

wês groete

oer it tsjerkhôf yn de nacht
trêdet Gabriël
syn iene wjuk lam
syn kroade fol mei teddybearen

it spoar fan wite fearren yn de moarn
as dat fan in slachte do
rint oant it rustich stek
mei dizenich ljocht derefter

yn de krante hawwe se it oer stjalprein
it reint ek hieltyd faker teddybearen
komt troch feroaring
fan it klimaat

Oersetting Syds Wiersma

Ina Schroders-Zeeders is dichter fan de moanne maart 2024. Har earste moannegedicht is ‘nu het nacht is / no’t it nacht is’.

nu het nacht is

moeders van vermoorde aleksejs
uit elkaar gerukte lijken in gaza
handen stekend uit aarde
wachten

aangestampte graven
grijze moddersteden
lichaamvretende raven
wachten

gekgeworden wereldleiders
opgefokte waarheidmijders
dolgedraaide vrijheidsstrijders
wachten nu het nacht is
wachten af

no’t it nacht is

memmen fan fermoarde aleksejs
teskuorde liken yn gaza
hannen stekkend út ’e grûn
wachtsje

oanstampte grêven
grize drekstêden
lichemfrettende ravens
wachtsje

gekwurden wrâldlieders
opfokte wierheidsmijers
healbizen frijheidsstriders
wachtsje no’t it nacht is
wachtsje ôf

Oersetting Geart Tigchelaar