Ik bin berne en opgroeid yn in doarp nei oan de Alde Feanen. Omdoarmje yn de fjilden of mei de skou it wetter op is wat ik it leafste die. Hiele ferhalen en gedichten fantasearre ik dan ûnderweis en jûns op bêd byinoar. It papier hellen se mar inkeldris en bewarre binne se nea. Dat kaam jierren letter pas. Doe die nei in CVA bliken dat ik de wurden yn myn holle wol fine, mar mei praten net goed mear diele koe. Lokkich slagget it my mei skriuwen op de pc al. Nei in poëzijkursus fan Abe de Vries en in worksjop fan Arjan Hut krige ik de guit opnij te pakken.
Ferskate kursussen, workshops en publikaasjes folgen. Gedichten fan my ferskynden û.o. op de webside fan RIXT, yn literêr tiidskrift Ensafh en yn de Moanne. Ek ferskynden fersen fan my yn útjeftes fan Fersefariaasje foar Ferstival, in foardrachtskriich foar jeugd fan 12 o/m 18 jier.
Ynstjoerde gedichten
Sekreet fan serebraal
Stil (4 maaie 2019)
Njoggentich (febrewaris 2020)
Ûngetiidzje (oktober 2020)
Headamskampen (oktober 2020)
It goud op de wei (11 juny 2021)
Oerwinning (23 febrewaris 2022)
SEKREET FAN SEREBRAAL sûnt oanset yn serebraal beskûle leit it longerjend op ’e loer oant dy neare neisimmerdei oanboazjend komt it oer benearjend ferdizenje bylden lûden ferstilje ta rûzjen en betize tinzen fâldzje it ferfleine yn in ferlamjende dize wâljende eangst wol ’k warre mar pandert eigen paad en panys komt preuveljend as los sân myn praat wylst it fluensk de flerken wuollet om ’t warleas wrakseljen hellet it my oer, lit ik my gean sûnder mear tsjin te akseljen © Anne Heegstra