Nijs

 

Op 18 oktober wurdt de Fryske oersetting fan Carsten René Nielsen syn nijste proazagedichtebondel Ienenfjirtich dingen (Utjouwerij Hispel) presintearre yn kafee De Gouden Leeuw yn Ljouwert.
Nielsen is in bekende yn Fryslân, mei’t er yn 2018 yn it Kulturele Haadstêdjier Ljouwert oandie en yn 2021 mei de boekpresintaasje fan de blomlêzing Oar hûs / Et andet hus (Utjouwerij Hispel) hat er mei oare Deenske dichters yn Ljouwert en Harns optreden. Syn fans hawwe der efkes op wachtsje moatten, mar no leit dêr de bondel Ienenfjirtich dingen, oersetten troch Geart Tigchelaar.
Op 18 oktober is de boekpresintaasje. Dêrby sil Tigchelaar de Fryske oersetting foarlêze. Fierders sil syn Nederlânsk/Fryske kollega-proazadichter Nyk de Vries de muzyk fersoargje, jout oersetster Lammie Post-Oostenbrink in skôging fan Deenske literatuer yn oersetting en drage de Fryske dichters Elmar Kuiper, Syds Wiersma en Cornelis van der Wal harren Aarhusiaanske gedicht út de bondel Oar hûs / Et andet hus foar. De jûn begjint om 20:00 oere en de tagong is fergees.
Carsten René Nielsen briek yn 1989 yn Denemarken troch by it grutte publyk mei de bondel Cirkler. Hy stiet sûnt dy tiid as dé Deenske proazadichter bekend en hat yn ’e rin fan ’e tiid syn oeuvre gâns útwreide. Ienenfjirtich dingen is njonken it Frysk oersetten yn it Ingelsk en Italiaansk.

Woansdeitejûn 26 april organisearre dichterskollektyf RIXT in Literêr Sirkwy mei foardrachten fan dichters dy’t ôfrûne winter in kursus ‘poëzy skriuwe’ folgen. De kursus wie in gearwurking tusken Tresoar en RIXT en waard holden yn Kafee De Gouden Leeuw by Tresoar. Ferskate dichters dy’t by RIXT oansletten binne, joegen de kursus. Der wiene alve dielnimmers. Sân fan harren droegen ôfrûne woansdei wurk foar: Sigrid Kingma, Tanja van Abbema, Ypie Bakker, Anne Heegstra, Christa Niklewicz, Grytine Twijnstra en Marije de Lange. De iennichste man dy’t de kursus folge, koe der spitigernôch net by wêze. Nei it skoft wie der in iepen poadium. Fiif dichters droegen dêr foar. De jûn waard ôfsluten mei wurk fan de ferneamde Katalaanske dichter Vicent Andrés Estellés (1924-1993). Ignasi Ripoll en Syds Wiersma makken de ôfrûne moannen Fryske oersettings fan in tal gedichten fan dizze dichter út Valencia. Sân dêrfan bondelen se yn in boekje, sadat it publyk meilêze koe.

 

 

 

 

 

Woansdeitejûn 26 april organisearret Dichterskollektyf RIXT wer in Literêr Sirkwy. Dizze kear by Tresoar, yn kafee De Gouden Leeuw. Dielnimmers oan de kursus ‘Poëzy skriuwe’, ôfrûne winter organisearre troch Tresoar en RIXT, bringe harren wurk nei foarren.  Nei it skoft is der in iepen poadium. Dêr sil ûnder oaren poëzy fan de Katalaanske dichter Vicent Andrés Estellés yn Fryske oersetting en yn it Katalaansk foardroegen wurde.

Wolkom!

Datum: 26 april
Tiid: 20.00-22.00 oere
Plak: Kafee De Gouden Leeuw, Tresoar, Ljouwert (Bûterhoeke 1, 8911 DH)

Tagong: fergees

Dichters: Sigrid Kingma, Carla van der Zwaag, Janna van der Meer, Tanja van Abbema, Ypie Haitsma, Anne Heegstra, Christa Niklewicz, Marije de Lange, Syds Wiersma, Ignasi Ripoll

Tresoar en it Frysk Film & Audio Argyf sette in grut part fan de audio-opnames fan Operaesje Fers wer online. It opnij beskikber stellen fan dizze ferneamde dichterskolleksje wurdt op de lanlike Gedichtedei (tongersdei 26 jannewaris) feestlik fierd yn Kafee De Gouden Leeuw yn Tresoar. Meindert Bylsma, ien fan de trije dichters dy’t yn 1968 it inisjatyf namen ta Operaesje Fers, sil ynterviewd wurde en guon gedichten út dy tiid foardrage. Willem Abma is der ek en sil ynterviewd wurde. Fan him sitte der mear as hûndert gedichten yn de kolleksje fan Operaesje FersFierders treedt in jonge garde dichters op, oansletten by de dichterskollektiven RIXT en Dichter Bij Leeuwarden. Ilse Vos, Marije de Lange en Preston Losack drage gedichten foar dy’t passe by de sfear dy’t de oprjochters fan Operaesje Fers foar eagen hiene: poëzy op fernijende wize ûnder de minsken bringe.

Sjoch foar mear ynformaasje by Tresoar

Streekdichter fan Noardeast-Fryslân, Geart Tigchelaar, presintearret op 26 jannewaris 2023 yn it stedshûs fan Dokkum syn nijste bondel Oer de streek (útjûn troch Hispel). Dat docht er foarôfgeand oan de oerdracht fan it stokje oan de nije Streekdichter.

Tigchelaar hat twa jier lang Streekdichter west en hat dêrby net allinnich in soad poëzy oer de streek skreaun, mar ek in grut tal projekten op priemmen setten. De gedichten dy’t er yn opdracht skreaun hat, wurde begelaat troch in koarte ûntsteansskiednis. Fierders stiet de bondel fol mei frij wurk, guon projekten en foto’s dy’t er makke hat op syn fytstochten troch de streek. Koart sein in bûnte bondel fan twa jier Streekdichterskip.

Geart Tigchelaar (1987) wie yn ’e jierren 2021 en 2022 Streekdichter fan Noardeast-Fryslân en hat it dêrby as syn taak sjoen om de poëzy ûnder de minsken te bringen. Dat hat er dien mei ferskate projekten, lykas Merkgedicht. Dêrmei stie er alle lêste woansdeis mei in gedicht op de merk yn Dokkum.

Plak: Stedshûs Dokkum, De Syl 2, 9101 ML Dokkum
Datum en tiid: Tongersdei 26 jannewaris om 16:30 oere.
De bondel is te krijen foar € 15,-.