6 o/m 7 july 2019: Hommage oan Aggie van der Meer ‘Sykje’
Ineke van der Heide by IepenUp Live
‘Bern genietsje litte fan gedichtsjes yn it Frysk, hoe moai is dat?’ Sa begûn dichteres Ineke van der Heide op freed 8 febrewaris 2019 op de Grutte Gedichtejûn fan Ensafh yn kafee Marktzicht te Drachten. Se droech foar út Broek mei bûsen, har twadde bondel foar bern en har earste Frysktalige bondel. No hat Ineke har oansletten by RIXT. Har dichtersprofyl stiet online en it gedicht ‘Knuffel’ út Broek mei bûsen stiet derby. Ofrûne woansdeitemiddei trede Ineke op by it Bernekolleezje fan IepenUp Live, foar in seal fol mei bern. Dieuwertje Blok wie der ek. It bernekolleezje fan IepenUP is ûnderdiel fan in rige Frijheidskolleezjes dy’t rûnom yn it lân hâlden wurde.
KNUFFEL
Lekker koese mei myn knuffels.
Mei de knyn en mei de ko,
mei de hûn en mei de do,
mei de aap en mei de bear,
mei it skiep en mei noch mear,
mei de mûs en mei de mol,
leit myn hiele bêd grôtfol.
Safolle knuffels by myn holle,
dat is fierste folle.
Ik pak myn alderleafste knuffelbear
mei de oaren koes ik in oare kear.
© Ineke van der Heide
Dichters fan RIXT drage foar yn Easterwierrum
Dichters fan RIXT Aggie van der Meer en Henk Nijp sille yn it ramt fan “Ús Festival” sneon 9 maart foardrage yn MFC “De Tysker” te Easterwierrum. Klik hjir foar in oersjoch fan alle aktiviteiten (pdf).
Fiskôfslach Laaksum
Nei oanlieding fan de sânwinningskwestje makke Tsjisse Hettema in nije ferzje fan syn gedicht oer de fiskôfslach fan Laaksum.
Fiskôfslach Laaksum
skean sjoch ik nei
wat de fiskôfslach wie
de grutte wysheid fan it gebou
leit stikkenslein
tiid ploege muorren en libbensskaad
ienriedich deselde kant út
de mar is leechhelle
spanningleas
tikket maklik stikken
op de sânplaten
van althuis hie it helendal ferkeard sjoen
der is gjin brekbere sfear
yn de doarpen
rûkt it nei âld sear
in narrich sykheljen om hâldfêst
oan klif en kust
bewust teater
foar in kapitale blunder sân
Hein Jaap Hilarides by Iepen Up op 30 Jannewaris
Hein Jaap Hilarides is dichter fan de moanne jannewaris by RIXT. Hy sil syn beide moannegedichten op 30 jannewaris foardrage by Iepen Up yn Neushoorn te Ljouwert en fertelt oer en lêst foar út syn nije bondel Ofskaid en Utsicht, in bondel mei ferhalen, stikkys en gedichten yn it Bilts, koartlyn ferskynd by Utjouwerij Louise.
Foto’s en filmke RIXT-dichters op it Greidhoek’ Festival te Wommels
Op 22-09-18 wiene fiif dichters fan RIXT oanwêzich op it jierlikse Greidhoek’ Festival yn Wommels, te witten Simen de Jong, Jetze de Vries, Syds Wiersma, Elmar Kuiper en Geart Tigchelaar. Tsjek de foto’s!
de man op ’e fyts
tak
tak
tak
tak
alle moarnen itselde
tak
tak
tak
tak
it ritme is gelyk
oan de omgong fan myn trapers
de pear meters wurde nea minder
de ôfstân yn myn holle wurdt al lytser
tak
docht syn kettingkast
it makket ús beiden net út
watfoar waar oft it is
ik moat nei skoalle
tak
en hy moat my
wat er no krekt wol
is de jacht genôch
wurdt syn fantasije
thús yn in âld sok útstoarten
tak
geane wy de bocht om
by de Tsjaardema’s
de boer seagen wy nea
mar de boerin namste mear
dy’t wy steefêst muoike neamden
yn har skelk sieten smoarge bûsdoeken
mar ek in see oan suertsjes
tak
it keale stik dêr’t de wyn
meast ferkeard stiet
hjoed is sa’n dei
sa stil dat de tak
noch grimmitiger klinkt
op it perverse ôf
tak
it hûs dêr’t Teade wenne
dy’t yn syn koarte libben
faker ferhûze wie as de roeken
nesten bouwe yn ’e beammen
op it hiem mei’t syn heit
op ’e nij beroppen waard
yn in gemeente dêr’t ik de namme
fan fergetten bin
tak
moarns is de wrâld op syn moaist
as it sintsje har nochris omdraaid
as de blêden noch slomje
fluitsje ik foar it lêst nei skoalle
om fan ’e man op de fyts ôf te wêzen
tak
tak
tak
tak
tak
tak
tak
© Geart Tigchelaar
Dichters fan RIXT by de Pauperfontein yn Beetstersweach
Op sneon 8 Septimber wiene fjouwer dichters fan RIXT presint by de Pauperfontein yn Beetstersweach. Dat wie yn it ramt fan Bourgondisch Beetsterzwaag. Tsjek de foto’s!
