De Deademansfeart, noardwestlik fan Hitsum, hie de namme te tankjen oan it lyk fan in jonge man dat yn in skier ferline ris yn dy feart fûn wêze moat. Yn it ûndersteand gedicht ferbynt Beart Oosterhaven dat feit mei it wetter fan ’e baaikûp, dêr’t Jim Morrison yn Parys yn oantroffen waard. Fierder ferwiist ‘feart’ nei de koarte ‘reis’ troch it libben fan sawol de deademan by Hitsum as fan Jim Morrison.
Oosterhaven: ‘Ik bin koartlyn nochris mei de trein fan Frjentsjer nei Harns by de Deademansfeart delkommen. Fan dy feart is neat mear oer. De bulten dy’t ik yn it gedicht neam, binne sljochte en it gers foar de boer al ynsiedde.’
Deademansfeart
-1971, 3 july.
ik sit mei twa angels
te fiskjen oan ’e Deademansfeart,
ûnder it spoar
tusken Frjentsjer en Harns.
-oer twa dagen wurd ik
15 jier âld-.
de Aristona-transistorradio ûnder myn
bûsgroen meldt dat
sjonger Jim Morrison
fan ’e Doors
-27 jier âld-
dea fûn is yn in
baaikûp yn Parys.
ein fan it berjocht.
‘se’ draaie Love Her Madly.
(wat in ferkearde kar.
When The Music’s Over hie
ommers folle better past!)
-2025, 28 septimber.
ik rin mei frou en hûn
de kant út fan ’e Deademansfeart,
in moai eintsje noardwestlik fan Hitsum.
-ik bin al in skoft
69 jier âld- .
de Samsung-mobile-telefoan yn
myn hân wiist it paad;
moai dúdlik.
-goed 54 jier nei Jim Morrison-
leit de Deademansfeart no fol bulten!
‘se’ hawwe ’m út ’e tiid holpen.
it wetter moat in oare rjochting sykje.
lykas de rockmuzyk yn 1971.